Як муҳоҷир дар Русия се кӯдакро аз коми оташ раҳонид

Дар шаҳри Березовскийи вилояти Свердловски Русия як муҳоҷири 32-сола, ки 16 сол боз дар ин кишвар ба ҳайси ронандаи таксӣ кор мекунад, се кӯдакро аз сӯхтор наҷот додааст.

Ба иттилои расонаҳои маҳаллӣ, номи ин қаҳрамон Саид Шарипов аст.

Сӯхтор шоми 14-уми май дар ошёнаи аввали бинои панҷошёнае дар шаҳраки Березовский рух додааст.

 

Посмотреть эту публикацию в Instagram

 

Публикация от YOUR TJ (@your_tj)

Ба гуфтаи Саид, ӯ ҳангоми бозгашт аз дорухона садои гиря ва кӯмакталабии кӯдаконро мешунавад. Бидуни дудилагӣ аз тиреза вориди хона мешавад ва ҳарсе кӯдакро, ки дар он лаҳза танҳо будаанд, аз коми оташ берун мебарорад.

Барои ин амали ҷасуронаи Саид сокинони маҳаллӣ ӯро қаҳрамон ном мебаранд.

Вале худи ӯ гуфтааст: «Ман танҳо вазифаи инсонии худро анҷом додам. Худам ҳам фарзанд дорам».

Аммо расонаҳо нагуфтаанд, ки Саид шаҳрванди кадом кишвар аст.

Ёдовар мешавем, ки охири моҳи гузашта як муҳоҷири тоҷик дар Москва сӯхтори мошини сабукравро хомӯш карда буд. 24-уми апрел шаҳрванди Тоҷикистон Отабек Мадраҳимов, дар яке аз шоҳроҳҳо шоҳиди оташ гирифтани нақлиёти сабукрав шуда, зуд ба кӯмак мешитобад.

Чор моҳ пеш як зодаи дигари Тоҷикистон Бахтиёр Исмоилов, дар вилояти Москва духтараки 11-моҳаро, ки дар роҳ бе либоси зимистона танҳо монда буд, наҷот дод. Бахтиёр дар як ширкати интиқоли ғизои тайёр кор мекард ва ҳангоми аз кор баргаштан дар роҳ кӯдакро мебинад.

Ба гуфтаи Исмоилов, ӯ таваққуф кард, духтарро ба мошин даровард, ба матоъ печонид, ба ёрии таъҷилӣ ва полис занг зад.