Президенти Қирғизистон, Содир Жапаров қонун дар бораи тасвиби Шартномаи марзи давлатии Тоҷикистон ва Қирғизистонро, ки 13 март дар Бишкек ба имзо расида буд, имзо кард.
Тавре дафтари матбуоти президенти Қирғизистон хабар додааст, дар зимни тасвиби шартнома, Содир Жапаров ду созишномаи дигарро низ ба тасвиб расондааст. Яке аз онҳо дар бораи таъмини дастрасӣ ба манобеи обу энергия ва сохтмону истифодаи роҳҳо, дигаре барои рушд ва истифодаи чорроҳаи роҳҳо байни ду кишвар мебошад.
Созишномаи мазкур ҳаракати бемонеаи шаҳрвандон, гузаштан ва истифодаи воситаҳои нақлиёт, ҳамлу нақли бор ва роҳи рушди иқтисоди байни ду кишварро пешбинӣ мекунад. Воситаҳои нақлиёт ва шаҳрвандони ҳарду кишвар, тибқи созишнома, метавонанд бе монеа ва мушкилот ҳаракат кунанд.
Дар созишнома ду шоҳроҳи стратегӣ ва муҳим барои истифодаи ҳарду кишвар баррасӣ шуда, нақшаи сохтмон ва истифодаи роҳҳо муайян шудааст. Ду гузаргоҳ бояд ҳамчун шоҳроҳҳои бетараф дар марзи ду кишвар истифода шаванд:
- гузаргоҳи “Дача – Капчигай” (Хоҷаи Аъло – Ворух), ки дар қисмати шарқии маҳаллаи Капчигай ҷойгир аст;
- гузаргоҳи “Мин-Орук – Самарқандак” (Ориёно – Шӯристон), ки дар канори шимолии шаҳраки Сурх қарор дорад.
Мувофиқи шартнома, роҳи “Дача-Қапчигай” (Хоҷаи Аъло – Ворух) аз ҷониби Тоҷикистон ва роҳи “Мин-Орук-Самарқандак” (Ориёно – Шӯристон) аз ҷониби Қирғизистон истифода хоҳад шуд.
Ҳамчунин, дар созишнома пешниҳод шудааст, ки чорроҳаҳои шоҳроҳи Ӯш-Раззоқов ва Исфара-Ворух, ки мақоми бетарафро гирифта, ба таври баробар аз ҷониби ҳар ду давлат истифода мешаванд, муштаракан таҳия ва истифода хоҳанд шуд.
Парлумони Қирғизистон ин санадҳоро 19 март ба тасвиб расонид. Пас аз тасвиб Қирғизистон тартиботи дохилии сарҳадро пурра иҷро кард. Акнун Тоҷикистон низ бо имзои қонуни алоҳида бояд ин шартномаро расман тасвиб кунад.
Ёдовар мешавем, ки 13 марти 2025 дар шаҳри Бишкек, президенти Тоҷикистон, Эмомалӣ Раҳмон ва президенти Қирғизистон, Содир Жапаров созишномаи ниҳоии марзи давлатиро имзо карданд. Бо имзои созишнома ва иштироки роҳбарони ду давлат, ду гузаргоҳи марзӣ, ки беш аз 4 сол боз баста буд, ба таври тантанавӣ боз шуданд.
Ҳамчунин, 18 марти 2025 дар иҷлосияи парлумони Тоҷикистон вакилони ҳамакнун собиқи созишномаи марзи Тоҷикистон ва Қирғизистон ду санади марбутро ба тасвиб расониданд, акнун бояд Эмомалӣ Раҳмон онро расман имзо кунад.
