Оди қурбониёни қоҷоқи одамон дар Тоҷикистон омори дақиқ нест, аммо мутахассисон ҳушдор медиҳанд, ки корҳои пешгирикунандаро дар ин самт фаъолтар кардан зарур аст. Чун тоҷикони ба доми одамҷаллобон афтида кам нестанд.
Мутахассисони ТҶ “Корвони Умед” ба Your.tj дар бораи чӣ гуна аз ҳолатҳои одамрабоӣ пешгирӣ кардан ва аз доми одамҷаллобон раҳоӣ ёфтанро нақл карданд.
Ба наздики Шивон Маллалӣ, гузоришгари вижаи СММ оид ба савдои одамон хулоса ва тавсияҳои худро ба Шӯрои ҳуқуқи башар пешниҳод хоҳад кард, ки дар рафти сафараш ба Тоҷикистон омода намудааст.
Шивон Маллалӣ ҳангоми сафараш ба Душанбе таъкид намуда буд, ки Тоҷикистон бояд корҳоро дар самти рафъи хариду фурӯши одамон фаъолтар созад.
Оиди вазъи савдои одамон дар кишвар, мо бо ҳуқуқшинос Мунирахон Ахмедова ва ҳамоҳангсози лоиҳаҳои “Корвони Умед” Зулфия Қосимова суҳбат кардем.
Тавре ин ҳуқуқшинос нақл мекунад, занҳо бештар ба истимори ҷинсӣ дучор меоянду мардҳо ба меҳнти маҷбурӣ. Ба гуфти ӯ одамҷаллобон барои ба дом афтонидани қурбонӣ роҳҳои махсуси худро доранд.
“Баъзеи онҳо фирмаҳои сайёҳӣ ташкил мекунанд ва гӯё одамонро ба хориҷа равон месозанд. Масалан, мегӯянд, ки таҳсил дар хориҷа ройгон, аммо ба ҷавонон раводиди сайёҳӣ медиҳанд ва вақте онҳо аз сарҳад мегузаранд ба ҷойҳои лозима интиқол медиҳанд. Ё ин ки эълон медиҳанд, “кор дар хориҷа бо маоши баланд, донистани забон ҳатмӣ нест”. Чӣ гуна инсон метавонад дар кишвари бегона бе донистани забон кори хуб пайдо кунад. Ана ҳамин аст, яке аз роҳҳои ҷалбкунӣ”, – мегӯяд, Мунирахон Ахмедова.
Раҳоӣ мушкил аст
Ба нақли ӯ аз дасти одамҷаллобон раҳоӣ ёфтани хело мушкил аст, қисми зиёди қурбониён абадан бе ному нишон мешаванд.
“Як ҷавони тоҷикро чанд сол пеш, ду – се нафар мард, ки худашонро муаллим муаррифӣ кардаанд, барои таҳсил дар Эрон дъват мекунанд. Онҳо гуфтаанд, ки худи ҳамин рӯз ба роҳ мебароянду мошин омодааст. Ин ҷавон, ки хатмкардаи Мадрасаи Тоҷикистон буд, орзу дошт, ки дар Эрон таҳсил кунад. Ӯ таклифи муаллимонро зуд қабул мекунад. Танҳо ба бародараш занг зада, мегӯяд, ки ман ба Эрон рафта истодаам барои таҳсил ва хайру хуш мекунад. Як маротибаи дигар аз Афғонистон занг зада мегӯяд, ки мо дар Афғонистон ҳастему роҳро идома дода ба Эрон меравем. Бо ҳамин ҷавон бедарак мешавад ва дигар на занг мезанаду на пайдо мешавад. Мо ба Сафоратхонаи Тоҷикистон ба Эрон муроҷиат кардем, ҷӯстуҷӯ карданд, пайдо карда натавонистанд”, – нақл мекунад, Мунирахон Ахмедова.
Дигар қиссаҳои қурбониёни савдои одамон ва роҳҳои пешгирӣ кардани чунин ҳолатҳоро аз подкасти мо бифаҳмед.
