Зани тоҷик ва 6 кӯдакашро ба Тоҷикистон баргардонданд

Як модари танҳоро бо шаш фарзанди ноболиғаш аз шаҳри Нижний Новгороди Русия ба Тоҷикистон баргардонидаанд. Дар ин бора намояндагии Вазорати меҳнат, муҳоҷират ва шуғли аҳолии Тоҷикистон дар Русия хабар дод.

Гуфта мешавад, намояндагӣ ва Ташкилоти ҷамъиятии тоҷикон “Умед” дар ин кор бо расонидани кӯмаки моддӣ ва ҳуқуқӣ саҳм гузоштаанд.

Намояндагӣ ҳуҷҷатҳои модар ва фарзандонашро омода намуда, барои баргардонидани онҳо ба Тоҷикистон муосидат намудааст.

Ташкилоти ҷамъиятии тоҷикон “Умед” бошад, барои зисти муваққатии модар ва фарзандони ноболиғи ӯ шароит фароҳам оварда, онҳоро се моҳ нигоҳубин кардааст.

Бо дастгирии соҳибкорон ба ин зан ва 6 фарзанди ноболиғаш билети ҳавопаймо харидорӣ карда шуда, онҳо ба Тоҷикистон парвоз карданд.

Дар ҳамин ҳол, намояндагӣ шарҳ надодааст, ки ин зан бо шаш фарзандаш кай ба Русия рафтааст ва чӣ гуна бе сарпаноҳ мондааст.