Тоҷикистону Қирғизистон омодасозии санадҳои сарҳади давлатиро оғоз карданд

Дар Душанбе аз 11 то 19-уми декабр вохӯрии навбатии гурӯҳҳои кории топографӣ ва масъалаҳои ҳуқуқии Тоҷикистон ва Қирғизистон оид ба делимитатсия ва демаркатсияи сарҳади давлатии ду кишвар баргузор шуд.

Дар ин бора АМИТ «Ховар» бо такя ба иттилои КДАМ-и Тоҷикистон хабар дод.

Гуфта мешавад, ҷонибҳо дар ҳошияи ин мулоқот корро бо мақсади таҳияи минбаъдаи ҳуқуқии гузариши хатти лоиҳавии сарҳади давлатии Тоҷикистону Қирғизистон шуруъ карданд.

Ба иттилои манбаъ, ҷонибҳо корҳоро дар ин самт дар мулоқоти навбатӣ, ки дар ҳудуди Қирғизистон баргузор мегардад, идома медиҳанд.

Манбаъ менависад, дар ҷамъбасти мулоқот Протоколи дахлдор ба имзо расид.

Ду рӯз пеш раиси КДАМ Қирғизистон Қамчибек Тошиев изҳор дошт, ки тафсилоти марзи Тоҷикистону Қирғизистон моҳи январ маълум хоҳад шуд.

Қаблан президенти Қирғизистон Содир Жапаров дар мусоҳиба бо нашрияи давлатии Қирғизистон гуфта буд, ки Тоҷикистон ва Қирғизистон минтақаҳои баҳсбарангези сарҳадро тақсим карданд.

“Метавон гуфт, ки мо ҳатто дар минтақаҳои баҳсбарангез забони умумӣ пайдо кардем. Минтақаҳое, ки муддати зиёд сабаби муноқиша буданд, баробар – 50/50 тақсим карда шуданд.

Баъзе қитъаҳо бо шартҳои баробар иваз карда шуданд. Ҳоло корҳо оид ба ҳуҷҷатгузорӣ ба анҷом мерасанд”,- гуфт Жапаров.