Тоҷикистону Қирғизистон барои донишҷӯён бурсия ҷудо накардаанд

Ин нуқтаро Ҷамшед Ҷӯразода муовини вазири маориф ва илми Тоҷикистон дар нишасти матбуотӣ, ки имрӯз 1-уми август баргузор гардид, қайд намуд.

Ӯ гуфт, ки то ба имрӯз ба таври расмӣ доир ба таҳсили донишҷӯёни тоҷик дар Қирғизистон маълумоти дақиқ нест.

“Аз ҷониби Қирғизистон барои Тоҷикистон бурсия ҷудо нашудааст. Дар Тоҷикистон низ бурсия ҷудо нашудааст. Ин масъала мавриди назар ва корбарӣ қарор дорад”,- гуфт ӯ ба рӯзноманигорон.

Дар нишасти матбуотии гузашта Рамазон Одиназода, директори Маркази барномаҳои байналмилалии Вазорати маориф ва илм гуфта буд, ки 42 донишҷӯи тоҷик дар Қирғизистон таҳсил мекунанд ва дар сурати муроҷиат вазорат онҳоро бармегардонад.

“Мо омода ҳастем, ки онҳоро баргардонем ва аз рӯи ихтисоси худашон ба донишгоҳҳои Тоҷикистон қабул кунем”, – гуфта буд Рамазон Одиназода.

Гуфтан ба маврид аст, ки қаблан чандин донишҷӯи тоҷик ба Сафорати Тоҷикистон дар Қирғизистон муроҷиат карда, хостори баргаштан ва идомаи таҳсилашон дар Тоҷикистон шуда буданд.

Аксари онҳо аз афзоиши фишору таъқиб дар пайи таниши муносибатҳои Тоҷикистону Қирғизистон шикоят доштанд.