Таъйини ректори нави Донишгоҳи давлатии Хуҷанд пас аз боздошти роҳбари пештараи он

Мирзотоҳир Набизода ректори Донишгоҳи давлатии Хуҷанд ба номи академик Бобоҷон Ғафуров таъйин гардид. Дар ин бора Қарори Ҳукумати Тоҷикистон нашр шуд.

Набизода то лаҳзаи таъйин гардидан ба ин мансаб ба ҳайси муовини ректор оид ба таълим дар ҳамин донишгоҳ фаъолият дошт ва собиқаи тӯлонии корӣ дар бахшҳои илм ва идоракунии иҷтимоии вилояти Суғд дорад.

Ин таъйинот дар пасманзари боздошти ректори пешинаи донишгоҳ, Аюб Усмонзода бо иттиҳоми фасод, сурат гирифт. Усмонзода моҳи марти соли ҷорӣ боздошт шуда, парвандаи ӯ то ҳол расман шарҳ дода нашудааст.

Тағйироти дигари кадрӣ

Ҳамзамон бо ин, Ҳукумати кишвар як қатор тағйироти дигари кадрӣ дар ниҳодҳои гуногун анҷом дод. Ҳамин тавр:

• Мӯъминзода Шероз – ректори нави Донишгоҳи давлатии ҳуқуқ, бизнес ва сиёсати Тоҷикистон дар шаҳри Хуҷанд таъйин гардид;
• Сафарзода Мунир – ректори Донишгоҳи давлатии Кӯлоб ба номи Абӯабдуллоҳи Рӯдакӣ таъйин гардид;
• Шарифзода Муҳамадзариф – аз вазифаи директори Корхонаи давлатии “Тиллои Тоҷик” озод ва ба вазифаи муовини раиси Кумитаи давлатии сармоягузорӣ ва идораи амволи давлатӣ таъйин гардид;
• Саид Холаҳмад – аз вазифаи муовини раиси Кумитаи давлатии сармоягузорӣ озод ва ба вазифаи директори Агентии хариди давлатии мол, кор ва хизматрасонӣ таъйин шуд;
• Бобоёрзода Бобоёр – муовини вазири нақлиёт таъйин гардид;
• Аҳмадзода Баҳромҷон – муовини вазири кишоварзӣ таъйин шуд;
• Ҳомидзода Бобоҷон – муовини директори Агентии таъминоти амволи махсуси назди Ҳукумат таъйин гардид;
• Икром Аҳкам – бо сабаби ба нафақа баромадан аз вазифаи муовини директори ҳамин агентӣ озод шуд;
• Саидзода Назаралӣ – директори нави Корхонаи давлатии №Тиллои Тоҷик” таъйин гардид.

Эмомалӣ Раҳмон, президенти Тоҷикистон кадрҳои навтаъйинро барои суҳбат ба ҳузур пазируфт.

Зимни суҳбат онҳоро ба хизмати содиқонаю софдилона ба Ватан ва мардуми Тоҷикистон даъват намуд.