Сокини Дарвоз ҳангоми ҷамъоварии чукрӣ ҷон бохт

Дар ноҳияи Дарвози ВМКБ як мард ҳангоми ҷамъоварии чукрӣ аз баландӣ сарозер шуда, ба ҳалокат расидааст. Дар ин бора Кумитаи ҳолатҳои фавқулодда хабар дод.

Ҳодиса дирӯз, 2 апрел, тахминан соати 8-и субҳ рух додааст.

Гуфта мешавад, марди 34-солаи сокини деҳаи Паткунови ҷамоати деҳоти Қалъаи Хумб барои ҷамъоварии чукрӣ ба кӯҳҳои наздики деҳа рафтааст.

“Баъд аз боришоти тӯлонӣ, замини кӯҳӣ лағжонак буд ва мард ҳангоми ҳаракат лағжида, аз баландии 60 метр сарозер шуда, дар ҷои ҳодиса фавтидааст. Ҷасади ӯ тахминан соати 15:00 аз ҷониби сокинони маҳаллӣ пайдо гардида, ба наздиконаш супурда шудааст”,- менависад КҲФ.

Кумита аз сокинони кишвар даъват мекунад, ки то ҳадди имкон аз рафтан ба кӯҳҳо, ҷамъоварии занбӯруғ, гиёҳҳои шифобахш, ҳезумчинӣ, моҳидорӣ ва шикор худдорӣ намоянд.