“Омӯзгор бояд дарс диҳад”. Вазири маориф гуфт, муаллимон набояд ба корҳои дигар ҷалб шаванд

Вазири маориф ва илми Тоҷикистон дар хусуси ҷалби омӯзгорон ба ҳашар ва корҳои дигар гуфт, омӯзгор ба ғайр аз додани дарс дигар ба ягон кор ҷалб карда нашавад.

Раҳим Саидзода вазири мариф, 31-уми январ зимни нишасти хабарӣ гуфт, “мо Қонун “Дар бораи мақоми омӯзгор” таҳия кардем, қонун дар корбарӣ аст, ман умед ба он дорам, ки дар рӯзҳои наздик ё моҳҳои наздик тасдиқ мешавад”.

 

Посмотреть эту публикацию в Instagram

 

Публикация от YOUR TJ (@your_tj)

“Яке аз бандҳои асосии қонун ҳамин аст, ки омӯзгор ба ғайр аз додани дарс, дигар ба ягон кор ҷалб карда нашавад. Омӯзгор бояд дарс диҳад”, - гуфт Саидзода.

Ин мансабдори тоҷик зикр намуд, ки дар қонун банди дигаре ҳаст, ки дар дарси омӯзгор ҳатто вазир ҳам ҳуқуқ надорад, ки бе иҷозати омӯзгор вориди дарс шавад.

“Омӯзгорро мо бояд халал нарасонем. Вақте одам ба як кор банд мешавад, нафари дигар фикрашро парешон кунад, чӣ қадар вақт даркор аст барои ба ҳолати аввала баргаштан”, - шарҳ дод вазир.

Қаблан борҳо дар шабакаҳои иҷтимоӣ дар хусуси ҷалби омӯзгорон ба ҳашар  ва дигар корҳои ҷамъиятӣ дар рӯзҳои истироҳатӣ вокунишҳо сурат гирифта буд.

Your.tj чанде пеш матлабе ба нашр расонда буд, ки омӯзгорон ва хонандагону донишҷӯёнро дар баъзе минтақаҳои кишвар дар рӯзҳои истироҳатӣ ба ҷамъоварии пахта ҷалб мекарданд.