Маош то 4000$. Пешниҳоди кор ба 600 шаҳрванди Тоҷикистон дар Кореяи Ҷанубӣ

600 шаҳрванди Тоҷикистон метавонанд барои кор ба Кореяи Ҷанубӣ раванд. Вобаста ба соатҳои корӣ ва хусусияти кори иҷрошаванда моҳона аз 1500 то 4000 доллари ИМА маош пешниҳод карда мешавад.

Дар ин бора Агентии бокортаъминкунӣ дар хориҷа хабар додааст.

Тибқи иттилои манбаъ, ҷойҳои корӣ дар соҳаҳои сохтмон, истеҳсолот, кишоварзӣ, саноати хӯрокворӣ ва дигар соҳаҳо ҳастанд.

Талабот ба довталабон:

Синну сол: аз 18 то 39-сола;
Солимии ҷисмониву равонӣ ва омодагӣ ба кори ҷисмонӣ;
Истиқомати доимӣ дар Тоҷикистон;
Надоштани доғи судӣ;
Надоштани таҷрибаи депортатсия аз Кореяи Ҷанубӣ дар гузашта;
Доштани шаҳодатномаи тахассусӣ (барои баъзе касбҳо бартарӣ дода мешавад);
Қобилияти супоридани имтиҳони забони кореягӣ (EPS-TOPIK).

Кор дар Кореяи Ҷанубӣ тибқи барномаи E-9 (Employment Permit System) — низоми расмии ҷалби коргарони хориҷӣ амалӣ карда мешавад.

Ба куҷо муроҷиат бояд кард?

Довталабон бояд худро дар Агентии меҳнат, муҳоҷират ва шуғли аҳолӣ дар назди Вазорати меҳнати Ҷумҳурии Тоҷикистон сабтином кунанд.

Хоҳишмандон бояд қабл аз бақайдгирӣ мусоҳибаи забонӣ супоранд.

Баъдан, довталабон аз санҷишҳои касбӣ, мусоҳиба ва имтиҳони “EPS-TOPIK” мегузаранд.

Нархи музди меҳнат:

Барои кафшергарон – аз 3000 то 4000 доллар
Барои дигар касбҳо – аз 1500 то 2000 доллар

Хароҷот барои сафар ба Корея ба зиммаи худи коргар аст. Аммо баъд аз расидан ба Корея, тамоми хароҷот, аз ҷумла манзил ва хӯрокро корфармои кореягӣ мепардозад.

Барои машварат ва бақайдгирӣ ба ин суроғаҳо муроҷиат намоед:

шаҳри Душанбе, кӯчаи Лоҳутӣ 108. Телефонҳо: 221 39 67, +992 555 55 10 80, +992 98 790 66 66, +992 91 331 71 71
шаҳри Хуҷанд, маҳаллаи 28, хонаи 2А. Телефон: +992 92 807 99 99
шаҳри Бохтар, кӯчаи Файзалӣ Саид 69. Телефонҳо: +992 90 580 00 63, +992 93 487 88 28
шаҳри Хоруғ, кӯчаи Н. Атобек 1. Телефон: +992 93 510 14 39

Тақрибан 30 нафар аллакай имтиҳонро гузаштаанд

Бино ба иттилои Агентӣ, дар доираи ҳамкорӣ бо Кореяи Ҷанубӣ, 27 нафар довталаб имтиҳонҳоро бомуваффақият супоридаанд ва рӯзҳои наздик ба ин кишвар мераванд.

“Аз 27 то 29 май дар шаҳри Душанбе, дар ҳамкорӣ бо HRDK EPS Center, имтиҳонҳои касбӣ, мусоҳиба ва санҷиши EPS TOPIK гузаронида шуданд. Натиҷаҳо 13 июн эълон гардиданд. Аз 31 иштирокчӣ 27 нафар муваффақ шуданд”,- хабар дод Агентӣ.

Созишномаи ниҳоӣ оид ба ирсоли шаҳрвандони Тоҷикистон ба Кореяи Ҷанубӣ 31 октябри соли гузашта ба имзо расид.

Мақомоти Тоҷикистон умедворанд, ки амалӣ шудани ин созишнома сатҳи бекориро коҳиш медиҳад ва бозори нави меҳнатиро барои муҳоҷирони тоҷик мекушояд.

То имрӯз чанд гурӯҳи муҳоҷирон аз Тоҷикистон ба Кореяи Ҷанубӣ сафар кардаанд.