Маҳдудияти мавсимӣ дар роҳҳои Тоҷикистон барои мошинҳои гаронвазн

Сар аз 1-уми май бинобар гармӣ барои ҳаракати мошинҳои гаронвазн дар роҳҳои кишвар маҳдудияти муваққатӣ оғоз шудааст.

Дар ин бора Вазорати нақлиёти кишвар имрӯз, 19-уми май хабар дод.

"Дар натиҷаи ҳавои гарм пӯшиши асфалти болои роҳҳо ҳангоми ҳаракати мошинҳои гаронвазн метавонад вайрон шавад”, - иттилоъ медиҳад ин ниҳод.

Ба навиштаи сомонаи вазорат, ин аз он сабаб рух медиҳад, ки ҳарорати баланд мумро мулоим месозад ва муқовимати роҳро ба вазни нақлиёт коҳиш медиҳад, ки ин боиси тағйири шакл (деформатсия) ва фарсудашавии роҳ мегардад.

Ин маҳдудият нисбат ба мошинҳое, ки мусофирон, кӯмаки башардӯстона, маҳсулоти хӯроквории зудвайроншаванда, борҳои хатарнок, калонҳаҷм, ангишт мекашонанд ва иҷозатномаи махсус доранд, татбиқ намегардад.

Тибқи қарори ҳукумат, маҳдудиятҳои мавсимӣ дар роҳҳои автомобилгарди зерин амал мекунанд:

• Душанбе – Чаноқ (Хуҷанд – Бӯстон –  сарҳади Узбекистон);
• Душанбе – Турсунзода – сарҳади Узбекистон;
• Душанбе – Қулма  (тавассути Ваҳдат – Данғара – Кӯлоб – Хоруғ –  сарҳади Чин);
• Ваҳдат – Рашт – Лахш – сарҳади Қирғизистон;
• Гулистон – Фархор – Панҷ – Дӯстӣ – сарҳади Афғонистон;
• Бохтар – Данғара;
• Кизил – Қалъа – Ҷарбуҷа (тавассути Қабодиён – Шаҳритуз – Айвоҷ – сарҳади Узбекистон);
• Душанбе – Бохтар – Панҷи поён – сарҳади Афғонистон;
• Айнӣ – Панҷакент – сарҳади Узбекистон;
• Истаравшан – Зафаробод – сарҳади Узбекистон;
• Конибодом – Деҳмой;
• Истаравшан – Зафаробод – сарҳади Узбекистон;
• Исфара – Ворух – сарҳади Қирғизистон;
• Ғафуров – Булоқ – Пунгон – сарҳади Узбекистон.

Тибқи қарори Ҳукумати кишвар аз соли 2011 ҳамасола аз 1 май то 31 август ҳаракати воситаҳои нақлиёт, ки аз 6 тонна бештар бор доранд, дар роҳҳои автомобилгарди қабати болоияшон мумфарш, аз соати 10:00 то соати 20:00 ҳаракати онҳо маҳдуд карда мешавад.