Иди Қурбон дар Тоҷикистон 28-уми июн таҷлил мешавад

Тибқи иттилои пешакии Шӯрои уламои Тоҷикистон имсол иди Қурбон рӯзи 28-уми июн таҷлил мешавад.

Ба иттилои Кумитаи дин, санаи расмии таҷлили ид рӯзи чоршанбе, дар ҷаласаи Шӯро эълон хоҳад шуд.

Иди Қурбон яке аз идҳои муқаддас дар дини ислом аст. Дар ин рӯз мардуми мусалмон қурбонӣ мекунанд. Сеяки гӯштро оила барои худ нигоҳ медорад ва ду ҳиссаи боқимондаро ба наздикону ниёзмандон хайр мекунад.

Ба ин тартиб, аввали ҳафтаи оянда тоҷикистониён ба ҳисоби рӯзи якшанбе чор рӯз пай дар пай истироҳат хоҳанд кард.

Бо мақсади таъмини давомнокии рӯзҳои ид бидуни танаффус тибқи қарори “Дар бораи гузарондани рӯзҳои ид ба рӯзҳои дигари корӣ дар соли 2023” рӯзи шанбеи 24-уми июн рӯзи корӣ буда, истироҳат ба рӯзи душанбеи 26-уми июн гузаронида мешавад.

Мутаносибан, якшанбеи 25-уми июн ва душанбеи 26-уми июн рӯзҳои истироҳат буда, 27-уми июн дар кишвар ҳамчун Рӯзи Ваҳдати миллӣ (рӯзи истироҳат) ва 28-уми июн Иди Қурбон, ки рӯзи истироҳат маҳсуб мешавад, таҷлил мегардад.