Дар Душанбе ниммарафони байналмилалӣ баргузор мешавад

Дар шаҳри Душанбе 19-уми апрел бахшида ба Рӯзи пойтахт ниммарафони XV байналмилалӣ баргузор мегардад. Дар он варзишгарон аз давлатҳои минтақа ва ҷаҳон низ иштирок менамоянд, хабар дод АМИТ “Ховар”.

Гуфта мешавад, барои баргузории ниммарафон аз ҳисоби маблағҳои фонди рушди пойтахт беш аз 590 ҳазор сомонӣ ҷудо гардидааст.

Ғолибон байни мардон ва занон бо чунин ҷоизаҳои пулӣ сарфароз мегарданд:

• 38 ҳазору 500 сомонӣ – ҷойи 1-ум;
• 33 ҳазор сомонӣ – ҷойи 2-юм;
• 27 ҳазору 500 сомонӣ – ҷойи 3-юм;
• 16 ҳазор сомонӣ – ҷойи 4-ум;
• 14 ҳазору 800 сомонӣ – ҷойи 5-ум;
• 11 ҳазору 500 сомонӣ – ҷойи 6-ум.

Варзишгарони ҳаваскор, ки ба масофаи 5 км медаванд, бо:

• 7 ҳазору 700 сомонӣ – ҷойи 1-ум;
• 5 ҳазору 500 сомонӣ – ҷойи 2-юм;
• 3 ҳазору 300 сомонӣ – ҷойи 3-юм қадрдонӣ карда мешаванд.

Ба иттилои манбаъ, масофаи ниммарафони 21 километру 97,5 метр аст ва он аз шоҳроҳи назди “Наврӯзгоҳ” оғоз шуда, дар майдони Дӯстӣ, назди муҷассамаи шоҳ Исмоили Сомонӣ ба поён мерасад.

Бояд гуфт, ки ниммарафони байналмилалии Душанбе аз соли 2014 ба тақвими мусобиқаи Созмони байналмилалии марафон ва дав ба масофаҳои дур дохил шудааст.

Танҳо соли 2020 ниммарафони байналмилалии Душанбе бо сабаби хуруҷи коронавирус дар ҷаҳон баргузор нашуд.

Натиҷаи беҳтарини варзишгарони тоҷик дар чордаҳ даври ниммарафони байналмилалии Душанбе ҷойи 2-юм байни занон ва ҷойи 4-ум байни мардон мебошад.