Боздошти мураббии кӯдакистон баъди марги як кӯдак дар Душанбе

Як зани 29-сола дар шаҳри Душанбе, ки ҳамчун мураббӣ дар кӯдакистони “Саволу ҷавоб” кор мекард, баъди марги яке аз кӯдакон дар ин муассиса, бо гумони “иҷрои номатлуби уҳдадорӣ оид ба таъмини бехатарии ҳаёт ва саломатии кӯдак” дастгир карда шуд.

Дар ин бора Вазорати корҳои дохилии Тоҷикистон хабар дод.

Манбаъ менависад, 19-уми май, тахминан соати 13:05, гумонбаршаванда дар вақти хоби кӯдакон онҳоро танҳо гузоштааст. Як писарбачаи 2-сола аз ошёнаи дуюми рахти хоб афтида, аз гарданаш дар панҷараи рахти хоб овезон шуда ба ҳалокат расидааст.

Гуфта мешавад, гумонбаршаванда аз моҳи майи соли 2023 дар кӯдакистони хусусии ҶДММ “Саволу ҷавоб”, бе фармон дар вазифаи ёвари мураббӣ кор карда, муддати 120 рӯз ғайриқонунӣ уҳдадориҳои онро иҷро намудааст.

Баъдан, 1-уми сентябри соли 2024, дар асоси фармони роҳбари кӯдакистони мазкур гумонбаршаванда ба ҳайси муаллимаи кӯдакистони мазкур таъйин гардида, аз моҳи апрели соли равон ба вазифаи мураббии гурӯҳи хурдсолони то 3-сола шифоҳӣ таъйин шуда будааст.

Ба иттилои ВКД, нисбати гумонбаршаванда парвандаи ҷиноятӣ оғоз карда шуда, тафтишот идома дорад.