Бо фармони Рустами Эмомалӣ. Намоиши такрории шоуи 500 дронҳо дар Душанбе

Имрӯз, 10-уми сентябр бори дигар дар майдони Нишони миллӣ намоиши такрории шоуи дронҳо бо унсурҳои нав баргузор мешавад, хабар дод ба Your.tj сардори Раёсати фарҳанги шаҳри Душанбе Нуралӣ Шоҳиён.

“Бо ташаббуси бевоситаи раиси шаҳри Душанбе Рустами Эмомалӣ, имшаб, соати 19:00 дар майдони Нишони миллӣ консерти идона ва намоиши зиёда аз 12-дақиқагии дронҳо баргузор мешавад. Дар ин намоиш бо ёрии дронҳо зиёда аз 13 унсури нав дар осмон муҷалло хоҳанд шуд”,- гуфт Шоҳиён.

Ба гуфтаи Шоҳиён, дар барномаи консертии имшаба сарояндагони ҷавони пойтахт Ҷовидон Нозимов, Хуҷастаи Мирзовалӣ, Фирдавс Ҳошимов, Соҳиб Назриев, гуруҳи рақсии Ҷаҳоноро ва дигарон ширкат мекунанд. “Пас аз барномаи консертӣ ва каме торик шудани ҳаво шоуи дронҳо оғоз мешавад”, - гуфт ӯ.

Шаби гузашта ҳангоми таҷлили ҷашни 30-юмин солгарди Истиқлоли кишвар дар маҷмааи давлатии «Наврӯзгоҳ» дар осмон бо ёрии дронҳо 9 унсури миллӣ намоиш дода шуд.

Бо ёрии дронҳо рамзҳои Тоҷикистон тасвир карда шуданд: харитаи кишвар, нишони миллӣ, тоҷи нимдоира аз ҳафт ситора, дил — рамзи муҳаббат бо рангҳои парчами миллӣ, обидаи «Истиқлолият ва Озодӣ», инчунин навиштаҷоти «Истиқлолият муборак бод!» бо имзои Президенти Тоҷикистон.

Ёдовар мешавем, ки шоуи дронҳо бори аввал дар Тоҷикистон роҳандозӣ карда шуд.