Барканории директори Фурудгоҳи Душанбе

Исматулло Абдуллозода, директори генералии Фурудгоҳи байналмилалии Душанбе ва муовинони ӯ барои “камбудиҳои ҷиддӣ дар фаъолият” аз вазифаҳояшон барканор карда шуданд.

Ин дастурро Эмомалӣ Раҳмон, президенти Тоҷикистон имрӯз, 2-юми май додааст менависад Хадамоти матбуоти роҳбари давлат.

Зайнулло Шарифзода, директори нави Фурудгоҳи байналмилалии Тоҷикистон таъйин шуд.

Ӯ то ин дам дар вазифаи директори Агентии хариди давлатии мол, кор ва хизматрасонии назди ҳукумати Тоҷикистон кор мекард.

Ҳамчунин, Эмомалӣ Раҳмон кадрҳои навро барои ишғоли вазифаҳои роҳбарию фармондеҳӣ дар сохторҳои муҳим, аз ҷумла Вазорати мудофиа, Қӯшунҳои сарҳадӣ, Вазорати меҳнат, муҳоҷират ва шуғли аҳолӣ, Бонки миллии Тоҷикистон ва як қатор ниҳодҳои дигари давлатӣ ба ҳузур пазируфта, ба онҳо дастурҳои мушаххас дод.

Бар асоси фармонҳои президент:

• Каримзода Муҳиддин – фармондеҳи Қӯшунҳои хушкигард;
• Мирзозода Саломатшо – муовини фармондеҳи Қӯшунҳои сарҳадӣ;
• Холмуҳамадзода Сорбон – директори Агентии назорати давлатии энергетикӣ;
• Муродализода Далер – муовини раиси Бонки миллии Тоҷикистон таъйин шуданд.

Бо қарорҳои Ҳукумати Ҷумҳурии Тоҷикистон низ як қатор таъйинотҳо сурат гирифтанд. Аз ҷумла:

• Абдурраҳмонзода Иноятулло – муовини вазири мудофиа оид ба ақибгоҳ,
• Раҳмон Исломиддин – директори Агентии стандартизатсия, метрология ва сертификатсия,
• Раҷабзода Ҳайдаралӣ – сардори Хадамоти зиддиинҳисорӣ,
• Каримзода Насимҷон, Норзода Шариф ва Ашурализода Абдураҳмон – муовинони вазири меҳнат, муҳоҷират ва шуғли аҳолӣ,
• Олимзода Зоҳир – муовини якуми раиси Кумитаи телевизион ва радио,
• Қурбонзода Усмоналӣ – муовини якуми директори Агентии суғуртаи иҷтимоӣ ва нафақа,
• Сатторзода Бобоҷон – ректори Донишгоҳи давлатии молия ва иқтисоди Тоҷикистон.

Ҳамчунин, роҳбарони Маркази миллии тарҷума ва маъмурияти минтақаҳои озоди иқтисодии “Ишкошим” ва “Данғара” низ бо кадрҳои ҷавон иваз гардиданд.

Президенти кишвар зимни мулоқот бо кадрҳои навтаъин ба масъулони бахшҳои мудофиа ва сарҳад таъкид намуд, ки назорати интизоми ҳарбӣ, сатҳи омодагии ҷангӣ, аз худкунии забонҳои хориҷӣ ва технологияи муосири низомӣ бояд тақвият дода шавад.

Ҳамчунин, ба истифодаи сариштакоронаи нерӯи барқ, коҳиши талафоти техникӣ ва пешгирӣ аз истифодаи ғайриқонунии он дастурҳои қатъӣ дода шуд.

Сарвари давлат таъкид намуд, ки дар интихоби кадрҳо бояд ба савияи донишу малака, касбият ва ҳисси масъулиятшиносӣ таваҷҷуҳи хос зоҳир карда шавад.