Қатли мармузи як кирокаш дар Ёвон: гумонбар хонандаи мактаб боздошт шудааст

Дар ноҳияи Ёвон ҷасади Лутфулло Сафаров 38-сола, ки дар ширкати “3333”-и ноҳияи Ёвон кор мекард, рӯзи 4-уми апрел дар майдони заминҳои кишт пайдо шудааст. Наздикони марҳум мегӯянд, ӯ бо 9 зарби корд кушта шуда, бо мошинаш гумонбарони номаълум фирор кардаанд.

Падари марҳум, Фатҳулло Сафаров, ба дар сӯҳбат ба Азия-Плюс гуфтааст, ки писараш рӯзи 3-юми апрел ба кор баромада ва дигар ба хона наомадааст. Тақрибан соати 17:30 ба мошини ӯ ду нафар нишаста гуфтаанд, ки онҳоро ба деҳаи Дастгирак барад. Дар роҳи нақлиётӣ ба Лутфулло ҳамла карда, аз пушт ва гарданаш се корд зада, маҷрӯҳ кардаанд. Пул ва ҳуҷҷатҳояш дар ҷайбаш боқӣ мондаанд.

Фатҳулло Сафаров илова кард, ки ҷасади писарашро як подабон ёфтааст ва ӯ дар бораи қатли писараш, нисфирӯзии 4-уми апрел аз як ҳамкори марҳум шунидааст.

Ба иттилои Азия-Плюс, марҳум Лутфулло Сафаров соҳиби зану чор фарзанд будааст.

Ба гуфтаи падари марҳум, як гумонбар, хонандаи мактаби деҳаи Дастгирак, боздошт шудааст. Вале ӯ бовар надорад, ки ин ҷавонон танҳо даст ба куштор задаанд ва эҳтимол ба ин амал 2-3 нафар дигар ҳам алоқаманд бошанд.

Мақомоти ноҳия то ҳол расман боздошти гумонбар ё ангезаи ҳодисаро тасдиқ намекунанд ва таҳқиқи қазия идома дорад.

Ин ҳодиса дар чанд рӯзи охир аввалин куштори мармуз дар Тоҷикистон нест. Шаби 1 ба 2-уми апрел дар шаҳри Кӯлоб ду зан ва як кӯдаки 6-сола кушта шуда, алайҳи яке аз наздикони онҳо парвандаи ҷиноӣ оғоз гардида буд.