Ҳамоиши “Модари қаҳрамон” дар Душанбе

Имрӯз, 12 июн дар маҷмааи “Комюнити”-и шаҳри Душанбе бо ташаббуси Фонди хайриявии “Музаффар” таҳти унвони “Модари қаҳрамон” ҳамоиши вижае баргузор гардид.

Чорабинӣ ба ифтихори Рӯзи Ваҳдати миллӣ ва дар ҳамкорӣ бо Кумитаи кор бо ҷавонон ва варзиш, инчунин Кумитаи кор бо занон ва оила ташкил гардид.

Бори аввал, дар ин ҳамоиш модарони ҷавонони муваффақ, аз ҷумла варзишгарон, олимон, санъаткорон ва чеҳраҳое, ки Тоҷикистонро дар арсаи байналмилалӣ муаррифӣ кардаанд, гирд омаданд.

Дар миёни иштирокчиён инчунин модарони варзишгарони дорои маъюбият ҳузур доштанд, ки фарзандонашон парчами кишварро дар мусобиқаҳои ҷаҳонӣ баланд бардоштаанд.

Ин ҳамоиш бо мақсади арҷгузорӣ ба саҳми модарон дар тарбияи фарзандон ва комёбиҳои онҳо дар бахшҳои гуногун доир гардид.

Фонди “Музаффар” баргузории чунин чорабиниҳоро ҷузъи фаъолияти фарҳангиву иҷтимоии худ қарор дода, тавассути онҳо ба таблиғи тарзи ҳаёти солим, арзишҳои миллӣ ва муаррифии Тоҷикистон дар сатҳи байналмилалӣ мусоидат мекунад.