4 ҳолати ғарқшавӣ дар ду рӯз: як нафар наҷот ёфт

Дар Тоҷикистон ду рӯзи охири ҳафтаи гузашта чор ҳолати ғарқшавӣ сабт шудааст, ки аз онҳо танҳо як нафар наҷот ёфтааст. Ҷустуҷӯи ҷасади се нафари дигар идома дорад, менависад Кумитаи ҳолатҳои фавқулодда (КҲФ).

Тибқи иттилои манбаъ, бегоҳи 21 июн, тақрибан соати 17:30, сокини 16-солаи деҳаи Ваҳдатободи ноҳияи Панҷ ҳангоми оббозӣ дар канали деҳа ғарқ шудааст. Ҷустуҷӯи ҷасади ӯ то ҳол идома дорад.

22 июн, соати 16:00, сокини 26-солаи ноҳияи Фирдавсӣ дар рӯди Вахш, дар ҳудуди деҳаи Навободи ҷамоати Бохтариён ғарқ шудааст. Ба гуфтаи КҲФ, сабаби ғарқшавӣ риоя накардани қоидаҳои шиноварӣ будааст. Ҷустуҷӯи ҷасади ӯ низ идома дорад.

Ҳамон рӯз, соати 14:20, марди 43-солаи шаҳри Хуҷанд, ки дар ҳолати сархушӣ дар макони мамнуъ оббозӣ мекард, дар дарёи Сир ғарқ шудааст. Ба гуфтаи КҲФ, ҷустуҷӯи ӯ то соати 20:00 идома ёфт, вале натиҷа надод ва субҳи имрӯз корҳои ҷустуҷӯ аз сар гирифта шудаанд.

22 июн, соати 15:05, сокини ноболиғи ноҳияи Ҷаббор Расулов ҳангоми оббозӣ дар рӯди Сир қариб ғарқ мешуд, вале наҷотдиҳандагони КҲФ сари вақт ба ҷои ҳодиса расида, ӯро наҷот додаанд.

Кумита бори дигар аз шаҳрвандон даъват мекунанд, ки ҳангоми оббозӣ қоидаҳои бехатариро риоя кунанд ва аз шиноварӣ дар ҷойҳои манъшуда худдорӣ намоянд.