30 рӯз бе сабтином дар Тоҷикистон барои шаҳрвандони Эрон

Шаҳрвандони Эрон акнун метавонанд бе бақайдгирии ҳатмӣ то 30 рӯз дар қаламрави Тоҷикистон иқомат кунанд. Ин тағйирот бар асоси қарори ҳукумати Тоҷикистон аз 29 майи соли 2025 ба низоми будубоши шаҳрвандони хориҷӣ ворид карда шуд.

Ба иттилои Вазорати корҳои хориҷӣ, ин иқдом дар доираи принсипи баробарӣ ва бо ҳадафи таҳкими ҳамкориҳои дӯстона бо кишварҳои ҳамсоя амалӣ гардидааст.

Бар асоси тағйироти нав, шаҳрвандони Эрон аз рӯзи вуруд ба Тоҷикистон метавонанд то 30 рӯз бе сабтиноми ҳатмии шиноснома дар мақомоти корҳои дохилӣ дар кишвар бимонанд.

Ин тасмим як бахши амалии тавсеаи муносибатҳои Тоҷикистону Эрон маҳсуб мешавад.

Ёдовар мешавем, ки дар доираи сафари давлатии президенти Эрон Масъуд Пизишкиён ба Тоҷикистон моҳи январи соли 2025, ду кишвар 23 созишномаи ҳамкориро ба маблағи беш аз 450 миллион доллар ба имзо расонданд ва низоми раводидро байни ду кишвар сода карданд.

Айни замон дар Тоҷикистон беш аз 160 ширкати дорои сармояи эронӣ фаъолият мекунад ва ҳаҷми мубодилаи мол миёни ду кишвар чандин маротиба афзудааст.