Дар моҳи апрел обу ҳаво дар Тоҷикистон тағйирёбанда шуда, баъзе рӯзҳо борон, раъду барқ ва жола пешгӯӣ мешавад. Суръати шамол дар баъзе ноҳияҳо ба 15-20 метр дар як сония мерасад.
Обу ҳавои моҳи апрели имсола ба моҳи апрели соли 2013 шабоҳат дорад, иттилоъ медиҳад Агентии обуҳавошиносии кишвар.
Дар вилояти Хатлон, дар водиҳо ҳарорати миёнаи ҳаво дар доираи меъёри иқлимӣ пешгӯӣ шуда, то 19 дараҷа ва дар доманакӯҳҳо то 13 дараҷа мерасад.
Ҳарорати рӯзона давоми моҳи апрел дар водиҳо аз 25 то 32 дараҷа ва дар доманакӯҳҳо то 24 дараҷа гарм хоҳад шуд. Эҳтимоли боронҳои шадид, раъду барқ ва жола низ вуҷуд дорад.
Дар вилояти Суғд, ҳарорати миёнаи ҳаво дар водиҳо ба 17 дараҷа, дар доманакӯҳҳо то 13 дараҷа, дар минтақаҳои кӯҳӣ то 7 дараҷа мерасад.
Тӯли моҳ ҳарорати ҳаво дар водиҳо ба 25-30 дараҷа ва дар минтақаҳои кӯҳӣ то 14-19 дараҷа мерасад. Ҳаҷми боришот дар доираи меъёри иқлимӣ буда, эҳтимоли боронҳои шадид, раъду барқ ва жола мавҷуд аст.
Дар ноҳияҳои кӯҳии тобеи ҷумҳурӣ ва ғарби Вилояти Мухтори Кӯҳистони Бадахшон ҳарорати миёнаи ҳаво дар доираи меъёри иқлимӣ пешгӯӣ шуда, аз 7 то 12 дараҷа гармиро ташкил медиҳад.
Баъзе рӯзҳо эҳтимол ҳарорати шабона то 0-5 дараҷа гарм поин равад, рӯзона бошад, то 8-13 дараҷа баланд мешавад. Ҳамчунин, дар тӯли моҳ борон, раъду барқ ва жола пешгӯӣ мешавад.
Дар шарқи Вилояти Мухтори Кӯҳистони Бадахшон ҳарорати ҳаво 1-3 дараҷа пасттар хоҳад буд. Тӯли моҳ ҳарорати ҳаво шабона аз 0 то 5 дараҷа гарм поин меравад, рӯзона бошад, аз 7 то 12 дараҷа гарм хоҳад буд.
Дар баъзе ноҳияҳо шамоли ғарбии шадид бо суръати 15-20 метр дар як сония пешгӯӣ мешавад.
