Дилшоди "красавчик" боздошт ва ба Душанбе оварда шудааст

Дилшод Саидмуродов, гумонбар дар одамрабоӣ ва куштори Шӯҳрат Исматуллоевро боздошт ва ба Душанбе овардаанд.

Тавре маълум шуд, ӯ охири ҳафтаи гузашта истирдод шудааст.

Дилшод Саидмуродов яке аз гумонбарони аслӣ дар рабудан ва қатли муовини аввали раиси Ориёнбонк Шӯҳрат Исматуллоев аст.

Дарҳол пас аз содир кардани ин ҷиноят ӯ ба қаламрави Русия фирор кардааст.

Гурӯҳи ҷинотӣ рӯзи 23 июн Шӯҳрат Исматуллоевро рабуда, бо зӯр ба мошини тамғаи “Хундай Соната” савор карда, ба самти деҳаи Шодоб-1, воқеъ дар ноҳияи Варзоб бурданд.

Исматуллоев дар яке аз хонаҳои деҳа то соати 3-и 24-уми июн бо истифода аз қувваи ҷисмонӣ, электрошокер, автофен ва дигар воситаҳо мавриди шиканҷа қарор гирифта, дар натиҷа кушта шудааст.

Барои пинҳон доштани осори ҷиноят одамрабоён дар километри 130-уми шоҳроҳи Душанбе-Чаноқ ҷасади Исматуллоев ва мошинро ба дарёи Зарафшон партофтанд.