Дар Русия мехоҳанд аз муҳоҷирон пеш аз вуруд шаҳодатномаи тиббӣ талаб карда шавад

Думаи давлатии Русия тарҳи нави қонунеро баррасӣ мекунад, ки тибқи он, муҳоҷирони меҳнатӣ бояд то вуруд ба қаламрави Русия санҷишҳои тиббиро гузашта, шаҳодатномаҳои дахлдорро пешниҳод кунанд.

Ярослав Нилов, раиси Кумитаи кор, ҳифзи иҷтимоӣ ва собиқадорон дар телеграм-канали худ хабар додааст, ки ин пешниҳод бо мақсади таъмини бехатарии санитариву эпидемиологии кишвар таҳия шудааст.

Ба гуфтаи ӯ, муҳоҷирон бояд на танҳо суғуртаи тиббӣ, балки шаҳодатнома дар бораи надоштани ВИЧ, гепатити B ва C, сил, сифилис ва инчунин натиҷаи ташхиси набудани маводи мухаддиру моддаҳои психотропиро бо худ дошта бошанд.

"Хориҷиёне, ки барои пул кор кардан ба Русия меоянд, бояд мушкилоти моро ҳал кунанд, на мушкилоти худро биёранд", — навиштааст Нилов.

Ин пешниҳод дар пасманзари афзоиши нигарониҳо аз вазъи тандурустӣ ва бехатарии иҷтимоӣ дар ҷомеаи Русия ироа мешавад.

Бо вуҷуди маҳдудиятҳои ахир, Русия ҳамоно макони асосии кору зиндагии муҳоҷирони меҳнатӣ аз Осиёи Марказӣ боқӣ мемонад. Ба иттилои расмӣ, беш аз 1 миллион шаҳрванди Тоҷикистон дар қаламрави Русия кору иқомат мекунанд.