Дар Малайзия Ҳафтаи кинои тоҷик баргузор мегардад

Имсол дар Малайзия Ҳафтаи кинои тоҷик баргузор мешавад. Ин иқдом бо мақсади тарғибу ташвиқи фарҳанг ва санъати миллати тоҷик амалӣ мешавад, хабар медиҳад АМИТ «Ховар».

Қайд мегардад, ки ҳафтаи мазкур аз ҷониби Муассисаи давлатии «Тоҷикфилм» дар ҳамкорӣ бо Сафорати Ҷумҳурии Тоҷикистон дар Малайзия гузаронида мешавад. Вале рӯзҳои дақиқи баргузории он гуфта нашудааст.

Ба иттилои манбаъ, филмҳои истеҳсоли Тоҷикистон дар якчанд давлати ҳавзаи масъули сафорат, аз ҷумла Малайзия, Индонезия ва Тайиланд бо зерматни англисӣ намоиш дода мешаванд.

Ёдовар мешавем, ки 7 октябри соли 2024 барои муаррифии Ҳаким Абулқосим Фирдавсӣ ва «Шоҳнома»-и ӯ филми «Рустам ва Сӯҳроб» дар китобхонаи ҷамъиятии Селангори Малайзия ба намоиш гузошта шуда буд.