Дар якчанд масҷидҳои Душанбе муваққатан намозҳои ҷамоатӣ баргузор намегарданд

Дар шаҳри Душанбе аз 7 то 12 октябр баргузории намозҳои ҷамоатӣ дар масҷидҳои «Мавлоно Яъқуби Чархӣ», «Сари Осиё», «Абӯ Ҳанифа», «Ҳоҷӣ Исматулло» ва аз 8 то 12 октябр дар масҷиди ба номи Имом-ал-Бухорӣ муваққатан мавқуф гузошта мешавад.

Ба иттилои Раёсати ВКД дар пойтахт, ин маҳдудиятҳо бинобар баргузории чорабиниҳои муҳими сиёсӣ дар Душанбе ҷорӣ мешаванд.

Тибқи иттилоъ, дар ин рӯзҳо инчунин фаъолияти бозорҳои «Корвон», «Кӯшониён», «Меҳргон» ба истиснои нуқтаҳои фурӯши маводи хурокворӣ, инчунин марказҳои савдои «Панҷшер», «Ганҷина» ва «Садбарг» муваққатан қатъ мегардад.

Мақомот аз шаҳрвандон эҳтиромона хоҳиш менамоянд, ки дар ин рӯзҳо бе зарурати ҷиддӣ аз сафар ва воридшавӣ ба шаҳри Душанбе худдорӣ намоянд.

Қаблан расонаҳо иттилоъ дода буданд, ки тибқи қарори шаҳрдории Душанбе, ки онро муовини раиси шаҳр Абдураҳмон Абдураҳмонзода имзо кардааст, аз 8 то 10 октябр 11 бозор ва маркази савдо баста мешаванд.

Бозорҳои «Корвон» ва «Корвон-плюс», «Ховарон», «Мошинасарой» (Автобаза)-и 2927, «Кӯшониён», «Фаровон», «Балх» ва марказҳои савдои «Панҷшер», «Ганҷина», «Файёз-2015», «Варзоб ТҶ» ва «Кавсар» дар ин рӯзҳо кор намекунанд.

Ёдовар мешавем, ки дар пойтахти кишвар нишасти сарони давлатҳои ИДМ рӯзи 10 октябр ва вохӯрии сарони кишварҳо дар қолаби “Осиёи Марказӣ – Русия” дар назар аст.