Дар Истаравшан боздоштгоҳи муваққатии нав бо маблағгузории як соҳибкор бунёд шуд

Дар шаҳри Истаравшан боздоштгоҳи муваққатии нав (СИЗО) ба истифода дода шуд. Бино дар ҷамоати деҳоти Зарҳалол дар даромадгоҳи шаҳр ҷойгир буда, бо маблағгузории як соҳибкор, ки фарзандаш дар ин боздоштгоҳ нигаҳдорӣ мешуд, сохта шудааст.

Ба иттилои мақомоти маҳаллӣ, боздоштгоҳи қаблӣ, ки дар маркази шаҳр, дар поёни Қалъаи Муғ ҷойгир буд, беш аз 100 сол пеш бунёд шуда, ба талаботи муосир ҷавобгӯ набуд. Аз ҷумла, намнокии баланд дар бино боиси афзоиши бемориҳо, аз ҷумла сил, миёни боздоштшудагон гардида буд.

Муовини раиси шаҳр Парвизҷон Зафарзода ба Азия-Плюс гуфтааст, ки як соҳибкор пас аз дидани шароити нигаҳдории боздоштшудагон тасмим гирифтааст бинои навро бо тамоми шароити зарурӣ бунёд намояд.

Бинои нав 10 апрел бо иштироки роҳбарони соҳа, аз ҷумла сардори Сарраёсати иҷрои ҷазои ҷиноятӣ ва раиси вилояти Суғд мавриди истифода қарор гирифт. Иншоот бо шароити муосир, аз ҷумла фарши гарм ва дигар имкониятҳои зарурӣ муҷаҳҳаз шудааст.

Дар назар аст, ки дар рӯзҳои наздик боздоштшудагон ба бинои нав кӯчонида шаванд. Ба ҷойи боздоштгоҳи кӯҳна бошад, сохтмони бинои баландошёна пешбинӣ шудааст.

Тибқи омори расмӣ, дар Тоҷикистон 19 боздоштгоҳ ва зиндон фаъолият доранд. Бино ба маълумоти Ваколатдор оид ба ҳуқуқи инсон, беш аз 15 ҳазор нафар дар муассисаҳои ислоҳӣ адои ҷазо мекунанд, аммо омори дақиқи боздоштшудагон дар СИЗО-ҳо дастрас нест.