Дар Душанбе кандани панҷараҳои тирезаҳо оғоз шуд

Нашрияи “Паёми Душанбе” дар ин бора бо нашри чанд акс дар “Фейсбук” хабар дод.

Чанде пеш дар нишасти ҳукумати шаҳр гуфта буданд, ки панҷараҳоро тирезаҳои ҳамаи биноҳои шаҳри Душанберо мекананд.

Сабаби кандани панҷараҳоро масъулони шаҳрдорӣ гуфта буданд, ки “ҳусни шаҳрро коста мегардонанд ва ба меъёрҳои меъмории муосир ҷавобгӯ нестанд”.

“Бартарафсозии панҷараҳои худсоз дар намои асосии биноҳои истиқоматӣ дар кӯчаи с. айнӣ 64 д ва 64 е - и ноҳияи Шоҳмансур”, - навиштааст нашрияи шаҳрӣ.

Дар аксҳо дида мешавад, ки чанд нафар бо либоси ҳарбӣ ба кандани панҷараҳои тирезаҳо машғуланд.

Сокинони пойтахт дар шабакаҳои иҷтимоӣ аз ин тасмим изҳори нигаронӣ карда, мегӯянд, онҳо тирезаҳои худро барои амнияти фарзандони худ ва пешгирӣ аз дуздону ғоратгарон панҷарапӯш кардаанд.