Қарор аст моҳҳои наздик нархи билетҳои ҳавопаймоии ҳамаи ширкатҳои ватаниву хориҷӣ ба ҳамаи самтҳо арзон шавад.
Ин нуктаро Ҳабибулло Назарзода директори Агентии авиатсияи граждании кишвар зимни нишасти хабарии ниҳоди зертобеи худ таъкид кард.
“Ба тамоми ширкатҳои ҳавопаймоии ватанӣ ва хориҷӣ аз тарафи роҳбарияти фурудгоҳи Душанбе 40% ба ҳамаи ширкатҳои хизматрасонии умумӣ ва хизматрасонии рӯизаминӣ тахфифҳои калон пешниҳод шудааст. Ин иқдом барои арзон шудани нархи билети ҳавопаймоӣ гирифта шудааст”, – зикр намуд ӯ.
Назарзода қайд кард, ки мувофиқи ин тахфиф айни ҳол ширкатҳои хориҷӣ нархи билетҳоро 20-30% поён оварданд.
Дар нишаст ҳамзамон зикр гардид, ки ширкати “Тоҷикаэроновигатсия” нархҳои хизматрасонии аэроновигатсионӣ паст намуда, ширкатҳои сӯзишвории фурудгоҳ низ 20% нархи сӯзишвориро арзон кардаанд.
Ба назари Ҳабибулло Назарзода “тахфифҳои бузурге, ки ба ширкатҳои ҳавопаймоӣ пешниҳод кардаанд, нархи билетҳои ҳавопаймоӣ ба ҳамаи самтҳо бояд 40-45 дарсад арзон шавад”.
Ёдовар мешавем, ки Ҳукумати Тоҷикистон 12-уми июл қарори сиёсати “Осмони кушод”-ро қабул кард, ки мувофиқи он татбиқи принсипи паритет барои муҳлати номуайян қатъ мегардад.
Ин сиёсат имкон медиҳад, ки рақобат байни ширкатҳои ҳавопаймоӣ афзуда, нархи чиптаҳо низ арзон шавад.
