Чор гумонбари кушторҳо дар Конибодом ҳукми абад гирифтаанд

Чаҳор гумонбар дар кушторҳои пурсарусадо ва мармузи шаҳри Конибодом ба ҳукми абад маҳкум гардидаанд.

Дар ин бора раиси шаҳри Конибодом Даврон Зоҳидзода зимни нишасти матбуотӣ рӯзи 25 июл хабар дод.

Ӯ иброз дошт, ки тафтишоти қазия то ҳол идома дорад, вале нагуфт, ҳукм кай содир шудааст.

Ба иттилои мақомоти милитсия, ду шаҳрванди Қирғизистон низ дар робита ба ин кушторҳо таҳти ҷустуҷӯи расмӣ қарор доранд.

Силсилакушторҳо дар Конибодом аз баҳори соли 2024 оғоз шуда, то поёни сол ҳафт ҳолати куштори гурӯҳӣ сабт гардида буд.

Дар маҷмӯъ 25 нафар, аз ҷумла 8 ноболиғ, ба таври мармуз ба қатл расиданд.

Чаҳор нафаре, ки боздошт ва ба ҳукми абад маҳкум шудаанд, инҳоянд:

• Солеҳҷон Худойбердиев, 26-сола,
• Аҳадҷон Тухтаев, 27-сола,
• Бахтиёр Равшанов, 36-сола,
• Манучеҳр Одилов, 28-сола — ҳама сокинони шаҳру деҳоти Конибодом.

Ба иттилои Прокуратураи генералии Тоҷикистон ин афрод дар анҷом додани кушторҳои мудҳиш муттаҳам дониста шудаанд.