Маркази миллии тестӣ бақайдгирии довталабонро барои имтиҳонҳои марказонидаи дохилшавӣ барои соли 2022 аз 1 март оғоз мекунад. Довталабонро лозим аст, ки ҳуҷҷатҳои лозимаро омода карда, дар яке аз нуқтаҳои бақайдгирии наздик ба макони зист худро ба қайд гиранд. Имсол ба нақшаи қабули довталабон як қатор тағйиротҳо ворид шуданд, аз ҷумла маблағи шартномаи ҳамаи ихтисосҳои Академияи идоракунии давлатӣ арзон шуданд
Your.tj ба саволҳои батакрори нафароне, ки оиди бақайдгирӣ барои имтиҳонҳои марказонидаи дохилшавӣ маълумот надоранд ҷавоб омода намудааст.
Довтлаб дар куҷо ва чӣ тавр худро ба қайд гирифта метавонад?
– Имсол дар 34 шаҳру ноҳияҳои ҷумҳури 40 нуқтаи бақайдгирӣ ва 25 нуқтаҳои бақайдгирии сайёр ташкил карда шудааст. Дар дилхоҳ нуқтаи бақайдгирӣ довталабон метавонанд худро бо пешниҳоди ҳуҷҷатҳои лозима ба қайд гиранд(беҳтараш нуқтаи бақайдгирии ба макони зистатон наздикро интихоб намоед). Рӯйихати марказҳои бақайдгириро метавонед дар ин ҷо бубинед.
Ҳамчунин довталабон барои осонии раванди бақайдгирӣ ва сарфаи вақти худу кормандон аз хизматрасонии “Пешномнависӣ” (бақайдгирии пешакӣ тавассути шабакаи Интернет) истифода карда метавонанд. Барои ин довталаб бояд маълумоти заруриро барои бақайдгирӣ (ному насаб, таърихи таваллуд, ҳуҷҷати тасдиқкунандаи шахсият, нишонии ҷойи зист, рақамҳои телефон, нишонии почтаи электронӣ, муассисаи таълимии дар он таҳсилкунанда (таҳсилкарда), комбинатсияҳои ихтисосҳои интихобкарда аз рӯйи бартарияшон, забон ва макони имтиҳонсупорӣ, макони фиристодани даъватнома ва ғайра) омода карда, ба низом ворид намояд. Довталаб баъдан барои расмӣ кардани номнависӣ ба яке аз нуқтаҳои бақайдгирӣ бояд ҳатман ҳозир шавад. Хоҳишмандон метавонанд дар ин ҷо худро пешакӣ ба қайд гиранд.
Марҳилаи бақайдгирӣ рӯзи 15 – уми апрел хотима меёбад.
Довталабоне, ки ихтисосҳоро аз филиали Донишгоҳи давлатии Москва ба номи М. В. Ломоносов дар шаҳри Душанбе ва ё Донишгоҳи Осиёи Марказӣ интихоб кардан мехоҳанд, бояд дар ин муассисаҳо низ бо пешниҳоди ҳуҷҷатҳои зарурии муайянкардаи муассисаҳои мазкур номнавис карда шаванд.
Муҳлати бақайдгириро худи ин муассисаҳо муқаррар мекунанд. Довталабони ихтисосҳоро аз филиали Донишгоҳи давлатии Москва ба номи М. В. Ломоносов дар шаҳри Душанбе интихобкарда дар худи ин филиал ва ихтисосҳои Донишгоҳи Осиёи Марказиро интихобнамуда дар нуқтаҳои бақайдгирие, ки донишгоҳи мазкур ташкил менамояд ба қайд гирифта мешаванд.
Барои бақайдгирӣ кадом ҳуҷҷатҳо лозим?
– Рӯйхати ҳуҷҷатҳои лозима барои бақайдгирӣ инҳо мебошанд:
1) шиносномаи миллӣ ё маълумотнома бо муҳру сурат аз ШВКД ва нусхаи он – барои шахсоне, ки синнашон ба 16 расидааст.
2) ҳуҷҷат дар бораи таҳсилот (маълумотнома аз муассисаҳои таълимӣ ё ибтидоию миёнаи касбӣ, аттестат дар бораи хатми муассиса, диплом бо замимааш агар таҳсилоти касбиро гузашта бошед);
3) расид (квитансия)-и пардохти маблағ аз яке аз филиалҳои БДА “Амонатбонк”;
4) ҳуҷҷати тасдиқкунандаи имтиёзҳо (агар дошта бошад):
– маълумотномаи силсиладор дар бораи маъюби гурӯҳи 1-ум ё 2-юм ё “кӯдаки маъюб” будани довталаб;
– хатти вафоти падар ва модар, шаҳодатнома дар бораи таваллуди довталаб ва нусхаҳои нотариалӣ тасдиқшудаи ин ҳуҷҷатҳо – барои ятимони кулли то 21-сола;
– Маълумотномаи бепарасторӣ;
Ҳангоми бақайдгирӣ довталаб, дар баробари ҳуҷҷатҳои дахлдори зикршуда, маълумоти дигари зарурӣ, аз ҷумла рӯйхати комбинатсияҳои ихтисосҳои интихобкарда, иттилоотро дар бораи макон ва забони имтиҳонсупорӣ ба бақайдгиранда бояд пешниҳод кунад.
Арзиши хизматрасонии марказ чанд сомониро ташкил медиҳад?
Арзиши хизматрасонӣ барои шахсоне, ки бо мақсади иштирок дар ИМД-2022 аз қайд гузаштан мехоҳанд, дар мувофиқа бо Хадамоти зиддиинҳисории назди Ҳукумати Ҷумҳурии Тоҷикистон бо дарназардошти марҳалаҳои (асосӣ ва иловагӣ)-и бақайдгирӣ ва азнавбақайдгирии довталабон ва вобаста аз зинаи таҳсилоти шахси номнависшаванда чунин муқаррар гардидааст:
– 240 сомонӣ– барои шахсони дорои таҳсилоти миёнаи умумӣ (хатмкунанда ё хатмкардаи синфи 11-ум), ибтидоӣ ё миёнаи касбӣ;
– 180 сомонӣ– барои шахсони дорои таҳсилоти умумии асосӣ (хатмкунанда ё хатмкардаи синфи 9-ум);
– 25 сомонӣ – барои марҳалаи асосии азнавбақайдгирӣ ҷиҳати иваз кардани интихобҳои аввалӣ.
Ба киҳо дар пардохти маблағ имтиёз дода мешавад?
Тибқи тартиби муқарраркардаи Ҳукумати Ҷумҳурии Тоҷикистон барои шахсони зерин дар пардохти маблағ барои хизматрасонӣ дар ИМД имтиёз пешбинӣ гардидааст:
- Шахсони то 21-солае, ки ятими кул ё бепарасторанд, аз пардохти маблағ барои хизматрасонӣ дар ИМД озоданд;
- шахсони зерин аз пардохти 50 %-и маблағ барои хизматрасонӣ дар ИМД озоданд:
– шахсони то 21-солае, ки падар ё модарашон вафот кардааст ё дар парастории яке аз онҳоянд;
– маъюбони гурӯҳҳои 1-ум ва 2-юм ва “кӯдакони маъюб”.
Агар шахс ҳам маъюби гурӯҳи 1-ум ё 2-юм ё “кӯдаки маъюб” бошаду ҳам падар ё модараш вафот карда бошад, ё дар парастории яке аз онҳо қарор дошта бошад, он гоҳ ӯ аз пардохти маблағ барои хизматрасонӣ дар ИМД озод аст.
Шахси аз пардохти 50 %-и маблағ барои хизматрасонӣ дар ИМД озодбуда, агар дорои таҳсилоти умумии асосӣ (хатмкунанда ё хатмкардаи синфи 9-ум) бошад, 90 сомонӣ ва агар шахси мазкур дорои таҳсилоти миёнаи умумӣ, ибтидоӣ ё миёни касбӣ бошад, он гоҳ 120 сомонӣ пардохт мекунад.
Шахсони дорои имтиёзҳои зикргардида ҳангоми бақайдгирӣ бояд ҳуҷҷатҳои дахлдорро пешниҳод кунанд.
Маблағро чӣ тавр пардохт кардан мумкин?
Имсол довталабон имкони пардохти маблағи хизматрасониро барои иштирок дар ИМД тавассути марказҳои хизматрасонии “Амонатбонк”, инчунин воситаҳои электронӣ доранд.
Вобаста ба ин, хоҳишманди иштирок дар ИМД-2021 бояд маблағи дахлдорро дар яке аз марказҳои хизматрасонӣ ё филиалҳои Амонатбонк ё тавассути барномаи мобилии “Амонат мобайл” пешакӣ пардохт карда, рақами расиди пардохтро бо ҳуҷҷатҳои дигари зарурӣ ба бақайдгирандаи нуқтаи бақайдгирӣ пешниҳод намояд.
Оё шахсоне, ки ба ягон намуди беморӣ гирифтор бошанд, дар дилхоҳ донишгоҳ таҳсил карда метавонанд?
Мамнуъияти таҳсил аз сабаби беморӣ, танҳо барои довталабони муассисаҳои таълимии тиббӣ пешбинӣ шудааст. Бо номгӯи бемориҳо метавонед дар ин ҷо шинос шавед.
Дар хотир дошта бошед, ки агар Шумо бали гузаришро соҳиб шуда бошед, вале гирифтори яке аз ин бемориҳои дар рӯйхат бошед, муассисаи таълимӣ Шуморо қабул намекунад.
Агар то 15 апрел худро ба қайд гирифта натавонем чӣ кор бояд кард?
Марказ барои онҳое, ки ҳангоми марҳалаи асосии бақайдгирӣ (аз 1-уми март то 15‑уми апрел) аз қайд гузашта натавонистаанд, аз ҷумла шахсоне, ки дар ин давра дар муҳоҷирати меҳнатӣ берун аз кишвар қарор доштанд ё дар хизмати ҳарбӣ мекарданд, аз 10-ум то 30-юми июн марҳалаи иловагии бақайдгириро дар нуқтаҳои бақайдгирии муайянкардаи худ ба роҳ мемонад.
Аммо барои бақайдгирии иловагӣ бо сабаҳои узрнок бояд ҳуҷҷатҳои тасдиқкунанда дошта бошед.
Мехоҳам ихтисосҳоямро иваз намоям, чӣ кор кунам?
Довталабе, ки мехоҳад ихтисосҳояшро иваз намояд, метавонад дар марҳилаи аз нав бақайдгирӣ худро аз нав бақайд гирад. Барои аз нав бақайдгирӣ ҳуҷҷаиҳои зерил лозиманд:
– шиносномаи миллӣ ё маълумотнома бо муҳру сурат аз ШВКД – барои шахсоне, ки синнашон ба 16 расидааст (барои шахсони то 16-сола – шаҳодатномаи таваллуд, маълумотнома бо муҳру сурат аз ҷойи зист);
– варақаи бақайдгирии марҳалаи асосии бақайдгирӣ;
– рақами расид (квитансия) аз яке аз филиалҳои Бонки давлатии амонатгузории Ҷумҳурии Тоҷикистон “Амонатбонк” оид ба пардохти:
– маблағи иловагӣ (барои марҳалаи асосии азнавбақайдгирӣ – аз 16-ум то 30‑юми апрел);
Арзиши таҳсил дар донишгоҳҳо чӣ қадар аст?
Арзиши таҳсил дар қисми зиёди коллеҷу донгишгоҳҳои Тоҷикистон ҳамасола тағйир меёбад. Имсол ҳам арзиши шартномаи баъзе муассисаҳо тағйир ёфтаанд. Арзиши таҳсил Шумо метавонед ҳангоми интихоби ихтисос аз роҳнамои довталаб дарёфт намоед.
Оё имсол ба нақшаи қабули донишҷӯён ягон тағйирот ворид шуд?
Вобаста ба тағйироти баамаломада номи баъзе аз муассисаҳои таълимӣ тағйир ёфт, баъзе аз ихтисосҳо аз феҳристҳо хориҷ гардид ва ба феҳристҳо якчанд комбинатсияи ихтисосҳои нав ворид карда шуд. Тағйироти дигари баамаломада кам шудани маблағи шартномаи таҳсил дар Академияи идоракунии давлатии назди Президенти Ҷумҳурии Тоҷикистон аз рӯйи ҳамаи ихтисосҳо аст.
Номгӯи як қатор ихтисосҳои Донишго славянӣ аз низоми тестӣ берун карда шуд ва ба ҷои онҳо ихтисосҳои нави ин донишгоҳ ворид шуданд. Дар бораи ихтисосҳои аз низоми тестӣ ихроҷ ва дохил шуд дар ин ҷо бихонед.
Муфасалтар дар бораи тамоми қоидаҳои низоми тестӣ метавонед аз шакли элктронии “Роҳнамои довталаб – 2022” маълумот бигиред.
Мавод дар такя ба сомонаи расмии Маркази миллии тестӣ ntc.tj омода шудааст.