Милитсияи Истаравшан зани 64-солаи сокини ин шаҳррро бо гумони ба худкушӣ расонидани келинаш дастгир кардааст. Дар ин бора Вазорати корҳои дохилии Тоҷикистон хабар дод.
Гуфта мешавад, ин зан нисбати келини 33-солааш “бадбинӣ пайдо карда, муомилаи бераҳмона намуда”, мунтазам шаъну эътибори ӯро паст мезадааст.
Ба иттилои ВКД, пас аз ҷанҷол бо хушдоман, “дар натиҷаи ҷабру зулми хушдоман”, шаби 12-уми март, тахминан соати 22:00 келин якчанд адад ҳабҳои гуногуни тиббиро “бо мақсади худкушӣ истеъмол намуда, заҳролуд гаштааст”.
Назари зан дар бораи ин иттиҳом дастрас нест.
Вазорат менависад, нисбати гумонбаршаванда бо моддаи 109 қисми 2-и Кодекси ҷиноятӣ парвандаи ҷиноятӣ оғоз карда шуда, тафтишот идома дорад.
Тибқи ин банди қонун дастгиршударо аз 5 то 8 соли зиндон таҳдид мекунад.
