Ба офатҳои табиӣ омода шавед! Ҳушдори КҲФ ба аҳолӣ аз боришоти шадиди чанд рӯзи оянда

Кумитаи ҳолатҳои фавқулодда ва мудофиаи граждании Тоҷикистон бо истинод ба Агентии обуҳавошиносии кишвар хабар медиҳад, ки рӯзҳои 3 – 7 апрели соли 2023 дар минтақаҳои кӯҳиву наздикӯҳии ноҳияҳои тобеи ҷумҳурӣ, вилоятҳои Хатлон, Суғд ва ғарби Вилояти мухтори кӯҳистони Бадахшон эҳтимоли омадани сел дар назар аст.

Эҳтимолияти ҳолатҳои фавқулодда

Рӯзҳои 4 – 6 апрели соли ҷорӣ дар дарёҳои Яхсу, Қизилсу (ҷанубӣ) ва дарёҳое, ки аз нишебиҳои ҷанубии қаторкӯҳҳои Ҳисор ҷорӣ мешаванд, хатари баландшавии сатҳи об боқӣ мемонад.

Дар натиҷаи боришоти зиёд афзоиши садамаҳо, дар сурати вайрон шудани системаи заҳбурҳо ва омадани сел зери об мондани маҳалҳои аҳолинишин эҳтимол дорад.

Инчунин, КҲФ аз эҳтимоли болоравии сатҳи об дар дарёчаҳо, зери об мондани хоҷагиҳои деҳқонӣ, роҳҳо, заминҳои кишоварзӣ ва биноҳои ёрирасон, хабар медиҳад.

Ба обхезӣ омода шавед

КҲФ ба хотири ҳифзи хонаҳо ва қитъаҳои наздиҳавлигӣ аз оқибатҳои сел аз аҳолӣ хоҳиш мекунад, ки тамоми заҳбуру ҷӯйборҳои назди маҳалли зисташонро тоза кунанд.

Илова бар ин, КҲФ ҳушдор медиҳад, ки ҳавои номусоид метавонад боиси осеб дидани ноқилҳои барқ, шикастани дарахтон, осеб дидани боми хонаҳо, иншооти таблиғотиву рекламаҳо гардад.

Дар робита ба ин, кумита ҳушдор медиҳад, ки зери симҳои барқ, дарахтон, лавҳаҳои таблиғотӣ, иншооти камэътимод наистед.

Ҳамчунин, дар чунин рӯзҳо аз рафтан ба саҳрову доманкӯҳҳо ба қасди ҷамъоварии занбӯруғ, чорворчаронӣ, моҳидорӣ ё шикор худдорӣ намоед, ҳушдор медиҳад Кумитаи ҳолатҳои фавқулодда.