Ба модари Қобилҷон Алиев хона тақдим кардаанд

Ба модари Қобилҷон Алиев, навраси 10-солаи тоҷик, ки чанде пеш дар як мактаб дар канораи Маскав кушта шуд, аз ҷониби ҳукумати Тоҷикистон манзили зист тақдим гардидааст.

Дар ин бора «Азия-Плюс» бо такя ба иттилои Шерзод Алиев, яке аз пайвандони Қобилҷон Алиев навиштааст. Ба гуфтаи ӯ, хона «аз номи ҳукумати кишвар» дода шудааст, аммо ҷузъиёти бештар ироа нашудааст. Манобеи дигар ин хабарро тасдиқ ё рад накардаанд.

Пайвандони наврас таъкид кардаанд, ки дар ҳоли ҳозир ба ҷамъоварии маблағ ниёз надоранд ва ҳеҷ гуна суратҳисоби бонкӣ барои кумак боз нест. Онҳо аз шаҳрвандон хостаанд, ки ба ҳеҷ ҳисоб пул нафиристанд.

Қобилҷон Алиев рӯзи 16-уми декабр дар яке аз мактабҳои вилояти Маскав бар пояи «нафрати миллӣ» аз сӯйи як навраси 15-солаи шаҳрвандии Русия кушта шуд. Ҷасади ӯ 18-уми декабр ба Тоҷикистон оварда шуда, дар деҳаи Аҷами ноҳияи Шаҳринав ба хок супорида шуд.

Кумитаи тафтишоти Русия нисбати гумонбар бо иттиҳоми куштор ва сӯиқасд ба куштор парвандаи ҷиноятӣ боз карда, ӯро барои ду моҳ ба ҳабси пешакӣ гирифтааст. Мақомоти Тоҷикистон ин ҳодисаро маҳкум намуда, аз ҷониби Русия таҳқиқи ҳамаҷонибаву беғаразонаро талаб карданд.

Ахиран дирӯз, 22 декабр Владимир Путин президенти Русия зимни суҳбат бо Эмомалӣ Раҳмон президенти Тоҷикистон дар робита ба ин куштор изҳори ҳамдардӣ кард.

Ӯ гуфт, ҳодисаи куштори кӯдаки 10-солаи тоҷик таҳқиқ шуда, гунаҳкорон ҷазо хоҳанд гирифт.

"Ба шумо ва оилаи писарбача аз Тоҷикистон, ки чанд рӯз пеш ҳалок шуд ҳамдардии самимонаи худро мерасонам.

Амалҳои террористӣ нисбати кӯдакон ин ҷинояти махсусан нафратовар аст. Бидуни ягон шубҳа таҳқиқот то охир расонида мешавад ва гунаҳкорон ҷазо дода мешаванд",- қайд намуд ӯ зимни суҳбат бо Эмомалӣ Раҳмон.