Тоҷикистон ва Қирғизистон ният доранд ду парвози нав байни ду кишвар боз кунанд. Дар ин бора АМИТ “Ховар” хабар дод.
Ба иттилои манбаъ, ин масъала 15-уми апрел зимни мулоқоти Ҳабибулло Назарзода ва Дониёр Бостонов роҳбарони агентиҳои ҳавонавардии шаҳрвандии Тоҷикистону Қирғизистон баррасӣ шудааст.
Гуфта мешавад, парвозҳои нав аз шаҳрҳои Душанбе ва Хуҷанди Тоҷикистон ба самти Иссиқкӯли Қирғизистон ба роҳ монда мешаванд.
Ҳамчунин, ҷонибҳо мехоҳанд шумораи парвозҳоро аз шаҳрҳои Душанбе ва Хуҷанд ба шаҳри Бишкек зиёд кунанд.
Манбаъ менависад, зимни мулоқот тақвияти ҳамкориҳои дуҷониба дар самти таъмини амнияти парвозҳо ва амнияти ҳавонавардӣ, инчунин баланд бардоштани рақобатпазирии соҳаи ҳавонавардии шаҳрвандӣ низ баррасӣ шуданд.
“Пас аз мулоқот, бо мақсади баланд бардоштани сатҳи дониш ва малакаҳои касбии мутахассисони соҳаи ҳавонавардии шаҳрвандӣ, лоиҳаи Ёддошти тафоҳум ба имзо расид”,- менависад АМИТ “Ховар”.
Ёдовар мешавем, ки ширкати “Сомон-Эйр” 14-уми март пас аз чор сол қатъи хатсайри ҳавоӣ миёни Тоҷикистон ва Қирғизистон аввалин парвози ҳавоиро дар самти Душанбе-Бишкек-Душанбе анҷом дод.
Пас аз он, 16-уми март ширкати “Asman Airlines”-и Қирғизистон аввалин хатсайри мустақими ҳавоӣ дар самти Бишкек-Хуҷанд-Бишкек анҷом дод.