Қатъи парвозҳо миёни Тоҷикистон ва Эрон

Парвозҳо ҳавопаймоҳо аз Душанбе ба Теҳрону Машҳад ва баръакс дар пайи ҳамлаҳои Исроил ба Эрон ва баста будани ҳарими ҳавоии Эрон қатъ шудааст.

Даргирӣ миёни ду кишвар 13-уми июн бо ҳуҷуми Исрол оғоз шуд.

Намояндагони ширкатҳои ҳавопаймоии Somon Air ва Varesh Airline, ки дар ин масир парвозҳо анҷом медиҳанд, дар хусуси қатъи парвозҳо ба “Азия-Плюс” хабар додаанд.

Намояндаи ширкати Varesh Airline гуфтааст, ки шаҳрвандони Эрон метавонанд бо гирифтани раводиди Туркманистон тавассути роҳи заминӣ вориди Эрон шаванд.

Қаблан Низомиддин Зоҳидӣ, Сафири Тоҷикистон дар Эрон ба расонаҳо гуфта буд, ки як гурӯҳи 30-нафараи ҳамватанонамон тавассути роҳи заминӣ ба ватан баргаштанд.

Баъдан расонаҳо аз берун шудани 10 нафар шаҳрванди Тоҷикистон аз Эрон тавассути Озарбойҷон хабар доданд.

Пас аз ҳамлаи таҷовузкоронаи Исроил ба Эрон, ки бомдоди 13-уми июн сурат гирифт, ҳарими ҳавоии Эрон баста аст.