Вазорати маориф гуфт, мисли пештара дар донишгоҳҳо, мактабҳо ва кӯдакистонҳои Тоҷикистон ороиши арча ва нишастҳои солинавӣ манъ аст.
Дар ин бора “Азия-Плюс” бо такя ба иттилои Вазорати маориф ва илми Тоҷикистон хабар дод.
Ба ҷои ин, вазорат иҷозат медиҳад, ки чорабиниҳои фарҳангӣ, аз қабили озмунҳои шеър ва расмкашӣ дар доираи дарсҳо ва соатҳои тарбиявӣ баргузор карда шаванд. Вазорат қайд кард, ки барномаҳои солинавӣ дар мактабҳои таҳсилоти умумӣ маҳдуд карда намешаванд, агар онҳо ба раванди таълим ворид карда шуда бошанд.
Тавре Вазорати маориф қайд намуд, дар чор ноҳияи Душанбе аллакай арчаҳо насб гардида, барномаҳои фароғатӣ ташкил карда шудаанд, то хонандагон бо падару модаронашон вақт гузаронанд.
Вазорати маорифи Тоҷикистон ҳамчунин таъкид кард, ки то ҳол дар ин масъала фармонҳои нав ҷорӣ нашудааст. Дар сурати тағйир ёфтани вазъ, маълумоти дахлдор расман нашр карда мешавад.
Аз соли 2012 Вазорати маориф ва илми Тоҷикистон баргузории ҷашнҳои солинавӣ дар мактабҳо ва боғчаҳои кӯдакона манъ кард.
Қаблан қарор бо дархости волидоне қабул шуда буд, ки аз ҷамъоварии маблағ барои баргузории чорабиниҳои солинавӣ ва инчунин бо мақсади мубориза бо исрофкорӣ шикоят мекарданд.