Ҳалокати 11 нафар дар як садама дар Файзобод

Шумораи қурбониёни садамаи мудҳиши нақлиётӣ дар ноҳияи Файзобод ба 11 нафар расида, 4 каси дигар бо ҷароҳат бистарианд. Қаблан расонаҳо аз марги 8 нафар хабар дода буданд.

Гуфта мешавад, хурдсолтарин қурбонии фалокат 2-сола ва бузургсолтаринаш 64-сола аст.

Фоҷиа рӯзи 2-уми июл дар ҳудуди деҳаи Шаҳтакиёни ноҳияи Файзобод рух додааст.

Ба иттилои ВКД, ронандаи автомашинаи "Опел-Астра", Маҳмадсодиқи Маҳмадюсуфи 30-сола ҳангоми ҳаракат аз самти шаҳри Ваҳдат ба самти муқобили роҳ баромада, ба нақлиёти Бобоҷон Шарипови 21-сола бархӯрдааст.

Қурбониёнро, ки ду ва ё се нафарӣ узви як оила ҳастанд, рӯзи 3-юми июл ба хок супурдаанд.

Дар наворе, ки дар шабакаҳои дида мешавад ду мошин дар роҳ сахт осеб дидаанд. Дар навори дигар камаш 6 нафари олуда ба хун рӯйи замин ва кати беморӣ дида мешаванд.

Дар се рӯзи охир, ба иттилои мақомот, тақрибан 13 нафар дар натиҷаи садамаҳо ба ҳалокат расидаанд.