Суди шаҳри Кӯлоб Аҳмади Иброҳим, рӯзноманигор ва сардабири рӯзномаи “Пайк”-ро ба даҳ соли зиндон маҳкум кардааст. Ҳукм имрӯз, 10-уми январ содир шудааст, хабар медиҳад Радиои Озодӣ.
Ин дар ҳолест, ки рӯзи гузашта як муроҷиати ӯ ба раиси Маҷлиси миллӣ ва шаҳрдори Душанбе Рустами Эмомалӣ нашр гардида буд.
Аҳмади Иброҳим моҳи августи соли 2024 дастгир шуда буд ва ба “ришвадиҳӣ ба корманди Кумитаи давлатии амнияти миллӣ”, “тамаъҷӯӣ” ва “ифротгароӣ” айбдор мешуд.
Ӯ дар номаи худ ба Рустами Эмомалӣ гуфтааст, “дар умрам ба касе пора надодаам, вале маро ба порадиҳӣ айбдор мекунанд. Дар умрам тамаъҷӯӣ накардаам, аммо маро ба тамаъҷӯӣ айбдор доранд. Дар умрам ифротгаро набудам, балки тӯли 22 соли охир ба ифротгароӣ мубориза бурдам. Чӣ гуна мани рӯзноманигор ва нависандаи 6 роман дар васфи зардуштиён салафӣ мешавам?”.
Аҳмади Иброҳим 63 сол дорад ва дар расонаҳои гуногун кор кардааст. Ӯ соли 2012 рӯзномаи хусусии “Пайк”-ро таъсис дода буд ва роҳбарии онро ба уҳда дошт.
