Вазорати корҳои хориҷии Тоҷикистон аз кушта шудани 25 сокини маҳаллӣ ва захмбардории 20 тани дигар расман хабар дод. Тибқи иттилоъ ин талафот дар натиҷаи ҳамлаи мошинҳои зиреҳпӯш ва ҳавопаймоҳои бесарнишини Қирғизистон ба ҷамоати Зумруд ва Овчӣ – Қалъачаи Бобоҷон Ғафуров ба амал омадааст.
Ин ниҳод гуфт, рӯзи 16 сентябр низомиёни Қирғизистон ба мошини ёрии таъҷилӣ, ки маҷрӯҳонро интиқол медоданд, тир холӣ карда, худи ҳамон рӯз ба бинои мактаби рақами 8-и Овчӣ- Қалъача зарба задаанд.
Ёдовар мешавем, ки нерӯҳои мусаллаҳи Қирғизистон рӯзи 16 – уми сентябр талаботи оташбасро вайрон карда, ба масҷиди деҳаи Овчӣ – Қалъачаи ноҳияи Бобоҷон Ғафуров бо истифода аз бесарнишинҳо ҳамла карда буданд.
