Дар шаҳри Душанбе дар се моҳи соли ҷорӣ 43 ҳолати монеъ шудан ба гирифтани таҳсилоти миёнаи умумӣ ба қайд гирифта шудааст. Гуфта мешавад, ки барои чунин волидон бо моддаи 164-и Кодекси ҷиноятӣ парванда боз шудааст. Дар ин бора Раёсати корҳои дохилии пойтахт хабар додааст.
Барои ин гуна қонуншиканӣ ҷарима ба андозаи 1000–1200 нишондиҳандаи ҳисоб (1 нишондиҳанда — 78 сомонӣ), корҳои ҳатмӣ аз 180 то 240 соат ё маҳрум сохтан аз озодӣ ба муҳлати 2 сол пешбинӣ шудааст.
Дар изҳороти мақомоти корҳои дохилӣ таъкид шудааст, ки волидон бояд ба тарбия ва таҳсили фарзандон ҷиддӣ муносибат кунанд, барои онҳо шароити зарурии омӯзиш фароҳам оваранд ва раванди таҳсилро зери назорати доимӣ нигоҳ доранд, зеро ояндаи ҷомеа аз тарбияи дурусти насли наврас вобаста аст.